20 Sept 2014 ~ Carlos Alberto Ruiz Cuellar:
nikneki nikmati tay anhinat:
kwak titaketzat inwan ne nawataketzat tik witzapan, mukaki inat "ejke te nikmati", "ejke walaja" wan su nitajkwilua kia ne, ika yejemet tesu inat "es que…" ika mukaki ken G, "ejgue" su nikneki nitajkwilua ken su kastiyaj.
niwelia nikwi kiunij?
ush nemi pal nitawawasua tik kastiyaj?
Alan R King:
Ninaskia ka uni se takutun ipal ne taketzalis ken taketzat ashan pero anka te muneki ma tikwikan uni kwak titajkwiluat ika tesu yekkaya Nawat. Wan su nina uni, tesu semaya ika naja nina: su tikintajtanilia ne Nawataketzat ipal Witzapan, naja nikmati ka yejemetsan nusan metzilwiskiat ma tesu titajkwilu uni ika te nemi yek. Nina ka yejemet te kinekit ma titawawasukan MUCHI tay inat, melka yejemet inat Tay tina, Werner?
Carlos Alberto Ruiz Cuellar:
wan ken weli tikmatit keman se muchiwa takutun ipal nawat wan tea kastiyaj? ika tikwit ne "pero" ashta kwak titajkwiluat
wan yemet' kikwit nusan "enkeseya", "jeguro", "nambe" y "púchica" itzalan ne tajtaketzalis tik nawat
Alan R King:
Yaja te semaya se tajtanilis ipal "keman muchiwa Nawat" sute ipal ne rejregistroj tekenhat ipal ne taketzalis. Welit tikmatit uni kwak kikishkejketzat ne rejregistroj ipal ne Castillaj ush ne Ingles. Taja tikmati ka te kenha senpa tay tiweli tina tik Castillaj kwa titajtaketza iwan ne mukujkunpawan, kwak titawawasua tik Ishkalamat, kwak titajkwiluat se amat ush kwak nikpata ne Bibliaj. Kwak titajtaketza iwan ne kujkunpawan tina "Hey qué chivo" pero tik ne Bibliaj te tiaw tikajsi "Hey qué chivo". Nusan tiweli tikwi sejse taketzalis ipal ne Ingles kwak titaketza ush titawawasua tik Ishkalamat ken "faragüey", "gran tugéder", "bróder", "maifrén"…, su tikneki, pero kwak tikchiwa se tajkwilul ipal ne tamachtiani tik ne weytamachtiluyan tesu tiaw tikchiwa uni! Muchi tikmatit ka nemit rejregistroj tekenhat tik se taketzalis. Nusan tik Nawat, nemit. Yajika ne tajtanilis tesu "Ini Nawat ush tesu Nawat" sute "Tik Nawat, keman naka yek ma nikwi ini wan keman te naka yek?" Naja nina ka nemi yek ma inakan "ejke" ne Witzapantekat kwak taketzat tik Nawat su yejemet kinekit pero anka te nemi yek ma tiktajkwilukan.
Ken tikmatit? Ken muchi tay tikmatit ipanpa se taketzalis. Naja nusan nina ka seuseujti chiupi uij, melka uni, te tiwelit tikelkawat ka se taketzalis kipia rejregistroj tekenhat.
Carlos Alberto Ruiz Cuellar:
Alberto Cruz nechilwij: maka shina "enkeseya" anka tiwelit tinat "melka"(aunque sea). yek nemiskia? Alan?
Alan R King:
Eje.
Carlos Alberto Ruiz Cuellar:
a padiush tel! ken senpa tinechpalewij wey!
Alan R King:
Te tatka, Carlos Alberto. Pero kwak TITAJTAKETZA iwan se pal Witzapan (ush iwan se tik Ishkalamat, su mugustoj), naja te nimetzilwia ka te yek ma shina "enkeseya" ush "ejke" su yejemet inat 'kiuni. Tay naja nina, ka kwak tiaw TITAJKWILUA ush kwak tikneki tikwi ne Nawat tik se contextoj "formal", ma te shikwi uni tajtaketzalis. Wan naja nikmati ka su se yejemet weliskia tajkwilua, nusan te kichiwaskia! Tikmati tay nina?
Carlos Alberto Ruiz Cuellar:
kia nikmati, pero te nikmati ken niu-nikita keman ninemi ishpan se contaxto formal wan keman te.
nina ka sema te niu-nitajkwilua wan niu-nikwi uni sema pal nitaketza wan sema inwan ne nikmati inat kia ne
Shikutzin Nawamumachtiani:
nina ne nawataketza, ken tejemetet tik kastiyaj, nusan taketzat icalichej, pero ma tesu tiktajkwilukan!